આસારામને હાઇકોર્ટમાંથી મોટી રાહત
આસારામના પુત્રએ હાઈકોર્ટમાં અરજી દાખલ કરીને તેની આયુર્વેદિક સારવારની પરવાનગી માંગી હતી.રાજસ્થાનની જોધપુર જેલમાં આજીવન કેદની સજા કાપી રહેલા આસારામને રાજસ્થાન હાઈકોર્ટ તરફથી મોટી રાહત મળી છે. આસારામે આયુર્વેદિક સારવાર માટે હાઈકોર્ટમાં અરજી કરી હતી. આસારામની અરજીનો નિકાલ કરતી વખતે કોર્ટે જરૂરી સૂચનાઓ આપી હતી.
આસારામના પુત્ર નારાયણ સાંઈ વતી એડવોકેટ પ્રદીપ ચૌધરીએ હાઈકોર્ટમાં અરજી દાખલ કરી હતી, જેમાં તેમણે આસારામની આયુર્વેદિક સારવારની વિનંતી કરી હતી. રાજસ્થાન હાઈકોર્ટમાં કેસની સુનાવણી દરમિયાન અરજદારના વકીલે જસ્ટિસ મદન ગોપાલ વ્યાસની કોર્ટમાં જણાવ્યું કે જોધપુર સેન્ટ્રલ જેલમાં સજા કાપી રહેલા આસારામની ઉંમર 85 વર્ષની આસપાસ છે. તે ઘણી બીમારીઓથી પીડિત છે. જેની સારવાર આયુર્વેદિક માધ્યમથી જ શક્ય છે.
