વડનગર : પાલિકા ચુંટણી માટે ભાજપ ઉમેદવારોની યાદી જાહેર : લ્યો બોલો ! મોદી ના ગામ માં મોદી ની જ બાદબાકી !
મોર્નિંગ ન્યુઝ ફોકસ ( સુના સો ચુના ) : આજે વડનગર નગરપાલિકાની ચુંટણી લડવા માટે ભાજપ દ્વારા તેના ઉમેદવારોની યાદી જાહેર કરવામાં આવી હતી. જેમાં કુલ સાત વોર્ડના 28 ઉમેદવારોની યાદી જાહેર કરવામાં આવી હતી. પરંતુ સૌથી આશ્ચર્યની વાત એ હતી કે પ્રધાનમંત્રી નરેન્દ્ર મોદીના વતન વડનગરમાં જ કોઈ મોદી અટકવાળા ઉમેદવારને ટિકિટ આપવામાં આવી ન હતી જેને લઈને અનેક તર્ક વિતર્કો થઈ રહ્યા છે.
પ્રાપ્ત માહિતી અનુસાર, વડનગર એ પ્રધાનમંત્રી નરેન્દ્ર ભાઈ મોદીનું વતન છે. જ્યાં મોદી પરિવારના આશરે 200થી વધારે ઘરો હોઈ શકે છે. ત્યારે વડનગર નગરપાલિકાની ચૂંટણીમાં ભાજપની ટિકિટ મેળવવા માટે મોદી અટક ધરાવનાર બે ઉમેદવારોએ ટિકિટ માગી હતી. પૂર્વ ભાજપ શહેર પ્રમુખના જણાવ્યા મુજબ, ટિકિટ માગનાર બે ઉમેદવારો પૈકી એક આશાબેન રાજેન્દ્રકુમાર મોદી અને બીજા શીતલબેન સતીશકુમાર મોદીએ નગરપાલિકાની ચૂંટણી લડવા ભાજપ પાસે ટિકિટ માંગી હતી પરંતુ તેમને ટિકિટ ફાળવવામાં આવી ન હતી. ત્યારે સ્વાભાવિક છે કે એવો સવાલ થાય કે મોદીના ગામમાં જ મોદીની બાદબાકી ? શું આ વખતે ભાજપને વડનગર પાલિકા સંપૂર્ણપણે હસ્તગત કરવામાં સફળતા મળશે કે કેમ ?
